【香港調酒】全香港調酒師一齊加人工好嗎？
相信今次依個題目，都可以算係大部份香港調酒師嘅心願，大佬呀！香港生活物價咁鬼貴，調酒師係一個餐飲專業，人工究竟可唔可以貼地啲呀，講到依度相信如果你係行外嘅人，都應該知道喺香港做調酒師其實人工確實係偏低，究竟問題出係邊度呢？有冇辦法上調呢？
現時香港調酒師人工係幾多？
最低大約係萬四五蚊起，平均價落係萬七八蚊左右，要視乎喺乜嘢類型嘅場入邊度工作，或者工作經驗而定，捱更抵夜辛辛苦苦現實就係得咁多，問你死未！咁有啲人又會話，你一路做落去會加人工㗎嘛，老實講每年等老細加嗰幾舊水人工就死得啦，就當自我感覺良好，咁做調酒師依個職位最高大約可以有幾多人工呢？依個問題其實好易理解，一個酒吧經理人工大概係兩萬四起標至三萬幾，咁調酒師嘅人工會唔會高過一個酒吧經理㗎？唔會吖嘛！咁咪即係調酒師人工最高去到二萬四左右壓力位囉，咁你又話有二萬四左右都幾好啦心滿意足，但事實如果你走去問十個調酒師入面有冇人攞到二萬四蚊人工，答案將會令你好失望。
點樣評估一個調酒師嘅內在值？
呢個問題可以大家一齊去思考一齊去答，假設我哋同朋友行街想搵一間餐廳食飯，理論上我哋應該係會搵間好嘅餐廳嘛，點樣為之好呀？第一樣嘢我哋係咪會睇睇依間餐廳嘅門面呀，個門面好靚仔同另一間個門面好多垃圾，你會揀邊間㗎？入到餐廳入面有服務員招呼帶位好，定係完全冇服務員理你，要你自己搵位坐，邊間服務較好呀？攞到餐牌睇一睇個價錢幾百蚊一個Main好，定係百幾蚊一個你會開心啲呀？個場啲枱好近令到客同客之間都好近好嘈好，定係啲枱嘅設置有一定空間闊落你會比較鍾意啲呀？叫一杯雞尾酒時嗰調酒師黑口黑面年初四死老竇咁嘅樣做俾你，定係有笑容親切啲你會比較喜歡呀？同朋友食飯去餐廳食物飲品質素好，定係一般快餐質素你較喜歡呀？
Hello!唔係講緊調酒師內在值問題嘅咩？係呀，原來不論人物或事情都好，都會因應身邊好多因素而評分，唔會係單單一點而定，而評分亦都唔會係自己評自己，而係人哋去評你，就好似頭先揀餐廳食飯嘅例子，我哋會根據好多唔同嘅因素去評估，而評估嘅人唔係餐廳自己而係顧客身上，而調酒師自己最基本只能夠做好本份或以上，因為顧客覺得你好唔好時，亦都因應四周環境或你的同事而作整體調整，所以如果要單純評論某個場所嘅調酒師內在值有幾多係唔準確同埋好困難，最主要係想指出其實調酒師嘅內在值同實際人工好多時並不相對，尤其係香港。
調酒師內在值＝人工高低
大錯特錯超級錯！呢個概念好多人包括好多行內人以為係啱，所以喺上一段用咁大嘅篇幅去比大家思考，好多人會話人工嘅高低係由老闆決定，但老闆出人工背後其實係將顧客嘅消費轉做人工出俾你，所以人工嘅高低其實係由顧客嘅消費而定，而顧客嘅消費亦會好似以上嘅例子唔會單單只看調酒師嘅內在值，你懂我意思嗎？當然如果你遇到衰格老闆就例外啦，哈哈！
咁究竟點樣可以提升香港調酒師人工呀？
嚟到呢度終於可以入返正題，從以上嘅解說我哋知道一樣嘢，唔可以單一淨係睇調酒師人工，酒吧入面調酒師、服務員侍應生、清潔員一般人工唔會相差太遠，而佢哋嘅人工唔會比副經理高，副經理人工亦唔會俾經理高，即係話各職位嘅人工係有關聯性，而唔會背馳而行，其次就係話人工嘅來源基本上係來自顧客嘅消費，酒吧有顧客先至會有人消費先再會有人工出糧。
所以要香港調酒師人工提升，其實係講緊整個餐飲業人工提升先有機會，而要令到整個餐飲業人工提升就係要令顧客消費提升，要顧客願意消費就係講緊整個餐飲業嘅質素，而唔係單一調酒師嘅質素，大家睇到呢度應該會感覺到一種失落感，因為要整個餐飲業質素提升談何容易呢？係㗎，香港餐飲業咁多年都冇乜大提升過，就係因為冇人去思考過同行出第一步，所以下面會提議幾個方向俾大家參考。
如果係調酒師嘅你，可以點樣呢？
選擇一：自我改變
改變成個行業需要時間，但改變自己就可以立即由依刻開始，提升自己嘅技能、服務、整潔⋯各項你個人做到嘅項目作全面提升，當你個人比其他行家強時，人工收入和小費收入理論上應該會有小量提升。
選擇二：改善自己酒吧質素
依一點如果你係酒吧話到事嘅人可以攪攪，要改變整個業界先改變好自己酒吧，唔好唔記得你嘅人工係尼自顧客消費，即係話你要喺顧客嘅角度去睇返你工作嘅酒吧，邊度需要改善可以做得更好，即時做出改善，越快改善就代表越多顧客願意消費，越多顧客消費就代表人工有機會作出中度提升，如果日後每間餐廳或酒吧都可以提升各項質素，整體餐飲業人工必定大大提升。
選擇三：轉換行業
眼見好多做咗好多年嘅調酒師都選擇轉行，就係因為過咗三十歲收入仍然係咁低會擔心未來日子，要錢照顧家庭可能有自己小朋友又要租樓或買樓，基本上俾你升到去經理先得嗰三萬真係搞唔掂，所以如果你身上有其他強項可以喺年青嘅時候令你收入更多，不妨轉行試試，咁樣講唔係叫你放棄調酒，即係你鍾意釣魚唔代表你要去做漁夫，你鍾意盆栽唔代表你要去做農夫，係年青嘅時候用你嘅強項搵最多嘅收入，直到儲備夠後捲土重來，開設自己嘅餐廳或者酒吧，同時做好質素，令餐飲行業更進一步。
今日嘅分享雖然做唔到調酒師人工迅速大大上升，但起碼簡單分析到原因同長遠改變策略，將來有冇機會成功唔係我地話亦都唔係你話，而係需要整個餐飲業每一個職位付出嘅努力，祝願各位同行朋友努力加油，永不放棄！齊心協力做好佢！
若想了解我們的調酒課程或購買調酒工具,可參觀以下我們的相關連結哦。
Comments